شعر امیری وطالبا
سئوال و جواب امیری
این نوع از اشعار به صورت سئوال و جواب مطرح شده است که به نوبه خود از اهمیت خاصی برخوردار می شده است و سئوال کننده سئوال خود را مطرح می کرد و جواب هم به صورت شعر جواب داده می شده است:
کدوم روزه که افتاب یک نم درنه؟
زمین مرس بون و چشم کفا درنه؟
کدوم شخصه که گارز گرنه و تن انه؟
کدوم شخصه که به داد ملت انه؟
روز قیامت هسه افتاب یک نم درنه
زمین مرس بونه چشم کفا درنه
جبرئیل امین گارز گرنه تن انه
محمد (ص) رسول الله به داد ملت انه
***
ونه بدونم ناف دونیا کجوهه؟
مغرب تا مشرق چند گز و چند وجوهه؟
هفت دریای او چند قطره و چند تپوهه؟
اگه جواب را بتی کل امیر ته بندوه
مکه معظمه ناف دونیا اونجوهه
مغرب تا مشرق خدای یک وجوهه
هفت دریای او علی (ع) ره یک تپوهه
این هم ته جواب بی بور ته آرزوهه
***
کدوم شخصه که نادین دارنه نا ایمون؟
کدوم شخصه که مقصره به زندون؟
کدوم شخصه که شیر هکرده پالون؟
کدوم شخصه که افتاب ره بیارده سامون؟
ابلیس لعین نا دین دارنه نا ایمون
همچنین وه مقصره به زندون
علی (ع) شیر هکرده پالون
خلاق جهون افتاب ره بیارده سامون
***
کدوم مرغه پر دارنه پا ندارنه؟
کدوم سوره وه بسم الله ندارنه؟
کدوم گله وه بو ندارنه؟
کدوم جاهه که مجشگاه ندارنه؟
اون مرغ ماهی هسه پر دارنه پا ندارنه
سوره توبه هسه که بسم الله ندارنه
اون گل پنبه هسه وه بو ندارنه
ته دریل هسه که مجشگاه ندارنه
***
کدوم سازه که دست نزه سرونه؟
کدوم اسبه که مار نزا کروهه؟
کدوم شمعه که شب تا صواحی سوهه؟
کدوم تیغه که استا چکش نزوه؟
اون ساز بلبله که دست نزه سرونه
اون اسب دول دوله که مار نزا کروهه
اون شع ستاره هسه شب تا صواحی سوهه
اون تیغ ذولفقاره که استا چکش نزوهه
***
گل دارمی گلاب ره کورمی؟
شیر دارمی کله قند نبات ره کورمی؟
دین اسلام دارمی جهان ره کورمی؟
روز قیامت دارمی حساب ره کورمی؟
گل دارمی گلاب هم ورنه
شیر دارمی کله قند نبات هم ورنه
دین اسلام دارمی جهان هم ورنه
روز قیامت دارمی حساب هم ورنه
***
ونه بدونم اول و آخر کی هه؟
ونه بدونم پیر منور کی هه؟
ونه بدونم فولاد انور کی هه؟
ونه بدونم شیر دلاور کی هه؟
خالق یکتا اول و آخر وهه
خلاق جهون پیر منور وهه
ذولفقار شاه فولاد انور وهه
علی (ع) شیر دلاور وهه
***
اشعار طالبا
مه طالب گم بیه فصل جوانی
ونه قسمت دیبیه ته خانمانی
ندارمه مار مه سه هاکنه مادری
خردمه مار هاکرده لاغلی سری
دله ره دکرده بیهوشه داری
مه طالب بخرده وا بهیه راهی
لعنت بر خورده مار و شی پسر داری
لعنت بر خورده مار و شی پسر داری
انده بورده طالب میونه هندی
هندی یه کنار داشته جفته انجیلی
ونه بالا نیشبیه کوتر چمپلی
ونه زیر نیشبیه آدم آبی
آدم آبی تو مه طالب ره ندی؟
طالب ره بخرده دریوی ماهی
بزنم سالیک و بیرم طلاجی
گردم ره دکنم رز رز شاهی
طالب مه طالب و طالب فرامرز
هر کجه دری خدا بیامرز
***
طالب ره بدیمه میون هندی
هندی مردمون قلیون او کرده
هندی زنانه وچه رو خو کرده
هندی کیجائونه کشه خو کرده
هندی مردمون چراغ سو کرده
قلی چار بیدار تو مه طالب ره ندی
قلی چار بیدار تو مه طالب ره ندی
قلی چار بیدار تو مه طالب ره بیار
طالب نمو ونه دعا کتاب ره بیار
صد تا گسفن دمه همه وره مار
صد تا مادیون دمه همه کره مار
صدتا گومش دمه همه باقه مار
صد تا شتر دمبه قطار به قطار
صد تمن پول اشمامه دمبه میون
بلکه ول هاکنن طالب نوجوون
گدا کیجا بیمه درمه بیابون
دعا کمبه پیدا بوه مه خاهون
طالب مه طالب و طالب خرما چش
از عشق زهره دل دارنه ناخش
***
عاشقی نکنین عاشقی سخته
عاشقی کره دیم دائم زرده
هر کی عاشقی شه کسب هاکرده
عمره صد و بیسته وه شصت سال هاکرده
عاشقی ره هاکردنه پیغمبرون
یوسف عشق ذلیخا بورده زندون
نجما و رعنا برار بینه سرگردون
خسرو و شیرین بوم دونا دون
مسکین و فاطمه گدای دل بیه خون
حضرت عباس من ته بازوی قربون
دمه ذولفقار هاکرده مسلمون
***
الهی لال بوه عمو ته دهون
دیگه این صوبت ره نیار مه میون
مه سره سیو می بوه مه رنگ دندون
غیر از طالب زهره نیره شه خاهون
صادق گد کله هسه سا تشی دندون
طالب فقط هسه مه جان خاهون
گمبه یا عباس مره صادق نونه
یا امام رضا مره صادق نونه
اون قفل طلا مره صادق نونه
محمد صل الله مره صادق نونه
علی مرتضی مره صادق نونه
مره طالب ورنه و خدا ندنه
***
گالشی هاکرد بیمه کنار بیشه
به درگاه الله زهره ناله تنیشته
دسه تور بزو مه جان شه لینگه تاشه
زمینه هاکرده ممرزه ریشه
صد تا گو بزا مه جان نخرده ششه
دکنم پیله طالب کم بخت جانه شه
طالب مه طالب طالب مهربون
گدا کیجا بیمه و درمه بیابون
